Masa ekstremisht të ftohta polare kanë përfshirë Siberinë-Rusinë, Skandinavinë dhe pjesë të Evropes lindore duke ulur temperaturat në mënyrë ekstreme, madje deri në -60 gradë Celsius në rajonin e Jakutisë në Rusi.
Dimri ka filluar mjaft ashpër sivjet edhe në Skandinavi, ndërsa kryeqendra ruse Moska është përfshirë nga stuhi të fuqishme bore, reshje të dendura bore dhe temperatura deri në -20 gradë Celsius.
Masa e ftohtë Siberike ka arritur deri në lindje të Evropes dhe po ashtu masa e ftohtë polare ka përfshirë edhe shumë pjesë të Evropes qendrore dhe veriperëndimore dhe për këtë mjafton të shohim jugun e Gjermanisë, gjegjësisht Bavarinë, pastaj Austrinë, pjesë të Polonisë, Çekisë dhe së fundi edhe Hungarisë etj.
Në territoret tona nuk kemi ndonjë goditje serioze polare apo siberike, ngase jemi nën ndikimin konstant të masave paksa më të ngrohta ajrore nga Atlantiku dhe Mesdheu, me inkursione të dobëta dhe afatshkurtra polare dhe kështu parashihet të jetë edhe gjatë ditëve të ardhshme. Mund të kemi një goditje paksa më serioze polare me reshje bore në mes të javës së re, megjithatë kjo është ende mjaft diskutabile dhe jo e sigurtë.
Në anën tjetër në jugperëndim dhe pjesë të Evropes perëndimore ka filluar depërtimi i ajrit më të ngrohtë nga Atlantiku dhe kjo pritet të shtrihet gradualisht në drejtim të Evropes qendrore.
Në fund të themi se sivjet dimri ka filluar me shumë dinamizëm në Evropë dhe po ashtu deri diku edhe në territoret tona dhe ky trend pritet të vazhdojë edhe tutje, me kombinime të masave ajrore të ftoha polare dhe siberike që vijnë nga veriu dhe lindja si dhe atyre më të ngrohta që vijnë nga Atlantiku dhe Mesdheu . Se cilat masa ajrore do të mbizotërojnë më shumë afër fundit të vitit është mjaft enigmatike të dihet nga tani dhe mbetet të përcillet gjendja mjaft interesante sinoptike gjatë ditëve të ardhshme./MeteoBallkan
