Lagështia e madhe që po sjell cikloni Mesdhetar në Kombinim me ajrin e ftohtë Siberik që po vjen nga veriu po shkakton reshje të fuqishme bore sot në Kroaci, Bosnjë dhe Hercegovinë, veriun e Malit të Zi dhe Serbi. Kosova ende gjendet nën ndikimin e ajrit të nxehtë Mesdhetar dhe kjo “luftë” mes ajrit të nxehtë nga jugu dhe ajrit të ftohtë nga veriu do të zgjasë sot gjatë tërë ditës kurse në mbrëmje sigurisht se do të “triumfojë” ajri i ftohtë. Në këtë mënyrë në mbrëmje apo gjatë natës do të fillojnë të fryjnë erëra të ftohta veriore të cilat do të shoqërohen edhe me reshje të dendura bore.
Reshjet e dendura të borës do të vazhdojnë edhe mëngjesin e së Dielës e ndoshta edhe paradite deri kah mesdita apo pasditja. Në shumicën e territorit të Republikës së Kosovës do të krijohen shtresa bore ndoshta me ndonjë përjashtim shumë të vogël. Pas ndërprerjes së reshjeve të borës priten një natë e ftohtë kurse të Hënën pasdite pritet të fillojnë reshje të reja bore të cilat do të intensifikohen natën në vijim. Reshje kryesisht të dobëta deri mesatare bore priten edhe të Martën, por ato pritet të ndërpritën gjatë mbrëmjes./Meteoballkan.
