Shfaqja më spektakolare e vitit e meteorëve dhe “fishekzjarrëve të qiellit” është pikërisht këtë javë pasi që toka rrugëton nëpër orbitën e kometës 109/swift-tuttle. Copëza pluhuri apo mbetje të kometës përplasën në atmosferën e tokës duke shkaktuar efektin e “rënjes së yjeve”. Disa nga këto dhurojnë pamje spektakolare duke ndriçuar qiellin sikur fishekzjarrë për një kohë shumë të shkurtër.
Nata e kthjellët dhe e ngrohtë e Gushtit dhe dendësia e meteorëve janë dy faktorët kryesor që e bëjnë Perseidin shfaqjen e vitit
Dy netët e ardhshme do të jenë më interesantet, kurse kulmi ose piku do të jetë natën e 12/13 Gushti. Meteorët Perseid 2022 do të mund të shihen më së miri nga mbrëmja , por njëkohësisht do të fillojë ndriçimi i hënës e cila mund të jetë pengesë për pamjet spektakolare të cilat do të ishin parë në orët e mëngjesit, megjithatë edhe me ndriçimin e hënës mund të shihen shumë meteorë nëse jemi në ndonjë vend malor-rural ku nuk ka ndriçim urban.
Entuziastë të këtij spektakli qiellor : dy netët e ardhshme sidomos natës e së premtës në të shtunën, zgjedhni një vend mundësisht rural/malor, larg dritave urbane dhe sytë nga qielli (syrit i nevojiten deri 20 minuta të mësohet me errësirën qiellore) dhe me pak durim do të kënaqeni me pamjet e meteorëve.
Duhet theksuar se vrojtimi i meteorëve është pothuajse i pamundur nëse do të jetë qielli tërësisht i mbuluar me re, por gjatë këtyre netëve priten intervale kthjellimesh dhe kalime vranësirash./MeteoBallkan
