Nesër në Kosovë pritet të mbajë mot kryesisht i vranët dhe vende-vende mund të ketë edhe riga afatshkurtra shiu si dhe ndonjë rrebesh lokal shiu me vetëtima dhe bubullimë. Ende në disa rajone priten intervale kohore me diell. Temperaturat do të fillojnë të pësojnë ulje që do të jetë shenjë e ndryshimit të motit që na pret sidomos të enjten.
Në Shqipëri nesër pritet të mbajë mot me vranësira dhe intervale kohore me diell. Vende-vende priten riga shiu dhe rrebeshe lokale me vetëtima dhe bubullimë. Reshje dhe rrebeshe më të shpeshta nesër priten në Mal të Zi, ndërsa në Maqedoninë Veriore dhe Luginën e Preshevës edhe nesër pa reshje, por me shtim lokal të vranësirave.
Pasnesër në tërë rajonin na pret mot i vranët dhe me reshje të dendura shiu. Vende-vende priten rrebeshe mjaft intensive shiu me vetëtima dhe bubullimë (Shqipëri-Mal të Zi). Në Kosovë dhe Maqedoni priten reshje shiu herë pas here intensive. Temperaturat pritet të pësojnë ulje të ndjeshme.
Ditëve të ardhshme na pret mot mjaft i freskët dhe kryesisht i vranët. Vende-vende, herë pas here priten reshje shiu. Nganjëherë në disa rajone mund të ketë edhe ndonjë interval kohor me diell. Në viset më të larta malore mund të kemi fjolla bore./Meteoballkan
