Përderisa tek ne po vazhdojnë reshjet e pandërprera të shiut si pasojë e ciklonit të fuqishëm i cili na erdhi nga Oqeani Atlantik përmes Detit Adriatik, në Evropën jugperëndimore dhe perëndimore ka filluar depërtimi i vrullshëm i ajrit të nxehtë afrikan. Përmes Spanjës nga Afrika veriore dhe veriperëndimore ajri i nxehtë fillimisht pritet të përfshijë Francën pastaj Italinë veriperëndimore dhe qendrore, Zvicrën, pjesë të Britanisë së Madhe, Gjermanisë etj.
Temperaturat pritet të arrijnë deri në 40 gradë Celsius në Francë, dhe mbi 35 gradë Celsius në Angli dhe Gjermani.
Cikloni për momentin është në Detin Jon dhe është dobësuar, por në kuadër të tij ende gjendet ajri jo stabil potencial për të vazhduar rrebeshet lokale të shiut. Cikloni do të vazhdojë të dobësohet në rrugëtimin e tij drejt Greqisë dhe Turqisë, por në disa vise në Greqi priten stuhi intensive. Rrebeshe lokale intensive priten ende edhe në Kosovë, Maqedoninë Veriore dhe Serbi.
Tek ne nxehtë do të jetë vetëm në viset bregdetare dhe mesdhetare , kurse në viset tjera do ti kemi edhe disa ditë të freskëta me reshje shiu dhe rrebeshe herë pas here dhe vende-vende intensive.
Sidoqoftë edhe tek ne temperaturat do të fillojnë të rikuperohen gradualisht, ndërsa vala e nxehtësisë mund të na prek gjatë javës së ardhshme por nuk pritet të jetë intensive sikur në Evropë më përjashtim të disa viseve në Shqipëri ku i nxehti pritet të rikthehet përsëri./Meteoballkan
