Reshjet lokale të borës të cilat kanë filluar në Kosovë pritet të intensifikohen në orët e pasdites e veçanërisht në orët e mbrëmjes dhe gjatë natës kur edhe pritet vala kryesore e reshjeve të borës nga ky ciklon dhe pritet të krijohen edhe shtresa në shumicën e territorit me përjashtim ndoshta të disa viseve të Dukagjinit ku për shkak të temperaturave bora nuk do të mund të qëndrojë. Në rajonet ku ka shtresa bore pritet që trashësia e borës të rritet dukshëm deri në mëngjes. Reshjet e borës në Kosovë pritet të pushojnë nesër paradite.
Reshje më intensive bore priten në viset kodrinore-malore dhe në gjysmën lindore të vendit, nëse mund ta ndajmë vendin në lindje – perëndim për arsye meteorologjike.
Sidoqoftë i ftohti nuk do të zgjasë shumë sepse që nga nesër pasdite do të ketë tendenca të ngritjes së temperaturave, kurse nga fundi i javës pritet që temperaturat të shënojnë ngritje të theksuar dhe në këtë mënyrë do të ketë shkrirje të shpejtë të borës sidomos nëpër ultësira. Priten edhe reshje shiu herë pas here të përziera me borë, kurse në viset malore reshjet e borës do të vazhdojnë herë pas here deri të shtunën./Meteoballkan
