Fronti i ftohtë ka ulur ndjeshëm temperaturat në Kosovë sot dhe në shumë rajone pati reshje shiu e bore, madje borë pati edhe në disa vise pak më të ulëta gjeografike. Fronti nuk ishte i fuqishëm sikur në Slloveni, Kroaci dhe Bosnjë dhe Hercegovinë dhe këtë e potencuam edhe dje.
Sot jemi nën ndikimin e masas anticiklonike në zhvillim e sipër, por në Afrikën veriore kemi masa ajrore gjigande me presion të ulët atmosferik. Në anën tjetër në Atlantik dhe Skandinavi kemi masa gjigande ajrore me presion të lartë atmosferik dhe kjo gjendje sinoptike favorizon mot mjaft të paqëndrueshëm.
Nesër dhe pasnesër në rajonin do të kemi vranësira, ndonjë interval kohor me diell, ndërsa reshjet atmosferike pritet të jenë simbolike dhe të izoluara në disa rajone në formë shiu e bore.
Të premtën në mbrëmje kemi afrimin e ciklonit nga Afrika Veriore dhe masat e fohta ajrore pritet të qëndrojnë dhe depërtojnë edhe më tutje. Të shtunën priten reshje shiu, bore e shqote, varësisht nga rajoni në rajon dhe lartësia mbidetare. Temperaturat nuk pritet të pësojnë ndonjë ndryshim të madh./Meteoballkan
