Gurët kanë filluar të lëvizin ngapak dhe disa modele globale për parashikim të motit parashohin një fund|Nëntor mjaft interesant sa iu përket reshjeve të mundshme atmosferike duke përfshirë reshje shiu dhe bore.
Fillimisht nga data 16 Nëntor modeli ECMWF parasheh depërtimin e masave ajrore të ftohta nga lindja e Evropës në drejtim të rajonit tonë, megjithatë ky i ftohtë sipas ecurive aktuale do të jetë i thatë sepse do të kemi ende efektin bllokues anticiklonik përkundër depërtimit të mundshëm të ajrit të ftohtë me origjinë nga Rusia kontinentale. Duke pasur parasysh se parashikimet afatgjata mund të jenë jokredibile nuk mund të themi se kjo është 100 për qind e vërtetë por ka lëvizje në këtë drejtim. Acari nuk parashihet të jetë i ashpër sipas ecurive aktuale por kjo do të varet shumë nga krijimi eventual i ndonjë cikloni i cili do të mund të shkaktonte depërtimin e masave ajrore më të fuqishme të ftohta nga Siberia në drejtim të rajonit tonë.
Për momentin këto janë vetëm disa tendenca për ndryshim të situatës sinoptike dhe ne do të jemi duke e përcjellur trendin i cili do të na udhëzojë ditëve të ardhshme në mënyrë që të kemi informacione sa më të sakta për ndonjë ndryshim eventual të motit nga 16 Nëntori e tutje. Deri atëherë mund të kënaqeni lirisht me mot stabil dhe relativisht të nxehtë vjeshtor kurse pas kësaj date do të shohim ecurinë e gjendjes sinoptike dhe do të ju njoftojmë në postimet tona të ardhshme./Meteoballkan.
