Nesër në Kosovë pritet të mbajë mot i vërtetë dimëror, me erëra të forta dhe të ftohta veriore dhe verilindore dhe reshje lokale bore. Reshje pak më intensive bore priten pasdite ose në mbrëmje. Erërat e ftohta veriore në shumë lokacione pritet të arrijnë shpejtësinë maksimale rreth 50km/h, ndërsa temperaturat do të shkojnë në “minus” në tërë territorin.
Në Shqipëri nesër pritet të mbajë mot kryesisht i vranët dhe i ftohtë, me erëra vende-vende të forta verilindore. Në verilindje, lindje dhe juglindje të vendit priten reshje lokale bore. Reshje sporadike bore mund të ketë edhe në vise tjera.
Mot i vërtetë dimëror nesër pritet të mbajë edhe në Maqedoninë Veriore, Mal të Zi dhe Luginën e Preshevës. Parashikohen erëra mesatarisht të forta dhe të ftohta veriore dhe reshje lokale bore.
Të mërkurën reshjet do të rrallohen, por na pret mot mjaft i ftohtë dhe me erëra mjaft të ftohta nga veriu dhe verilindja. Erërat janë si pasojë e ciklonit në ikje nga Greqia dhe anticikloni në ardhje nga Evropa qendrore. Ende priten reshje sporadike bore.
Nga e enjta më qetë por me acar të fortë polar. Zbutje të acarit mund të kemi përkohësisht nga e premta./MeteoBallkan
