Masa jashtëzakonisht e fuqishme ajrore anticiklonike nuk do të largohet aq lehtë nga rajoni ynë të paktën deri në javën e parë të vitit të Ri, ndërsa ka gjasa që të vazhdojë edhe më tutje.
Kjo masë gjigande ajrore siç mund ta shohim po kushtëzon mot stabil dhe po ashtu edhe jo aq të ftohtë për shkak të rrymimeve ajrore nga Mesdheu dhe Afrika Veriore në drejtim të rajonit tonë. Këtë sezonë kemi patur vetëm dy ose tri ditë të ftohta për shkak të ajrit polar, ngase ditët tjera kanë qenë të ftohta për shkak të inversionit të temperaturave, gjegjësisht mjegulles dhe vranësirave të ulëta.
Fundi i vitit 2022 nuk do të ketë ndonjë ndryshim të kushteve atmosferike. Anticikloni stabil do të vazhdojë të na sigurojë kushte stabile atmosferike. I vetmi problem mund të ndodhë që të kemi përsëri inversion të temperaturave për shkak të krijimit eventual të mjegullës nëpër lugina dhe ultësira. Kjo do të mundësonte “ngujimin” e temperaturave të ulëta në siperfaqe, ndërsa më nxehtë në këto raste do të jetë në zonat më të larta mbidetare.
Edhe Viti i Ri 2023 do të fillojë me mot stabil dhe dominim të plotë anticiklonik, madje pritet të fuqizohet edhe më tutje anticikloni që do të shtrihet që nga Afrika veriore, Mesdheu perëndimor e qendror dhe Gadishulli Ballkan. Temperaturat do të shënojnë rritje të mëtutjeshme në rajonin tonë në fillim të Janarit ngase do të kemi avansimin e ajrit afrikan dhe mesdhetar drejt viseve tona për shkak të “anticiklonit afrikan”.
Pra, gjasat për reshje bore këtë fundit dhe fillim të Vitit të Ri janë 0, por kjo nuk do të thotë se nuk do të kemi dimër, ngase kemi edhe tre muaj përpara dhe dimri nuk do të largohet pa lënë gjurmë, por në ç’masë dhe me çfarë fuqie këtë do ta mësojmë javëve dhe muajve të ardhshëm./MeteoBallkan
