Java e dytë e Janarit 2023 do të sjellë ndryshim të motit dhe kushte dimërore për viset kodrinore-malore ku priten edhe reshje të herëpashershme bore. Ulje të temperaturave do të ketë në të gjitha viset, por nëpër ultësira bora do të jetë e pakët dhe vetëm lokale.
Pas periudhës së gjatë të motit të qetë gjatë kësaj jave do të kemi mot shumë më dinamik dhe me reshje të herëpashershme.
Reshjet do të fillojnë sonte në tërë rajonin, ndërsa gjatë dy tri ditëve të ardhshme do të vazhdojnë me intervale të ndryshme kohore, pra herë pas here dhe do të jenë të karakterit lokal. Nëpër ultësira do të ketë kryesisht shi, ndërsa në viset kodrinore-malore do të ketë reshje shqote e bore. Reshjet e borës do të paraqiten vetëm në disa ultësira të Republikës së Kosovës.
Masat ciklonike do të jenë aktive deri të premtën. Nga e premta do të kemi stabilizim të motit dhe menjëherë do të pasojë rritja e temperaturave.
Edhe pse jemi pothuajse në mes të dimrit temperaturat nuk do të shënojnë ulje të mëdha dhe disa ditë dimërore do të jenë vetëm në viset kodrinore-malore dhe rrallë në ndonjë zonë më të ulët.
Pra, nga nesër deri të premtën na pret mot jo-stabil me reshje të herëpashershme lokale shiu e bore varësisht nga vendi. Të premtën përmirësim i motit dhe rritje e temperaturave. Ky përmirësim i motit do të vazhdojë edhe gjatë fundjavës./MeteoBallkan
