Zjarret nuk janë diçka e pazakontë për Havain, por ato që kanë shpërthyer ditët e fundit konsiderohen si nga më të këqijtë në historinë e arkipelagut.
Pasojat e tyre ishin shkatërruese dhe se çfarë i shkaktoi saktësisht zjarret vdekjeprurëse është ende duke u hetuar.
Erërat me forcë uragani dhe moti i thatë kontribuan në flakët. Thatësira ose kushtet jashtëzakonisht të thata në pjesë të mëdha të Havait – duke përfshirë të gjithë ishullin Maui – gjithashtu luajtën një rol.
Rreth 14 për qind e shtetit po përjeton thatësirë të rëndë ose të moderuar, ndërsa 80 për qind e Havait klasifikohet si jashtëzakonisht e thatë.
Muajin e kaluar, zjarre të shumta u raportuan në Maui, të cilat mbyllën për pak kohë autostradën. Është paralajmëruar se “rreziku i zjarrit gjatë këtij sezoni të thatë është rritur”.
Disa pjesë të ishujve Havai janë mbuluar nga barëra jo-vendase që janë më të ndezshme se bimët vendase.
Kjo, së bashku me kushtet e thata, mund të ndezë shpejt një zjarr. Maui ishte nën një alarm të kuq për rrezik të shtuar nga zjarri përpara se të shpërthenin.
Erërat e forta nga uragani Dora i ndezën më tej flakët. Guvernatori i Havait, Josh Green, tha se zjarret ishin “fatkeqësia më e madhe natyrore” në historinë e shtetit.
“Ne kurrë nuk kemi pasur një zjarr që godet një qytet si ky më parë”, tha ai, duke vënë në dukje se ndryshimi i klimës po ushtron presion të paparë në Havai.
Zjarri i fundit i madh ndodhi në vitin 2018 në Lahaina, i njëjti qytet që u shkatërrua nga zjarret këtë javë.
Ai shkatërroi 2000 hektarë tokë, 31 automjete dhe 21 ndërtesa. Zjarret dikur ishin relativisht të rralla në Havai, por aktiviteti njerëzor i ka bërë ato më të shpeshta dhe më ekstreme. /Telegrafi/
