Vapa afrikane ka përfshirë territoret tona duke rritur temperaturat pak në vlera ekstreme për këtë periudhë kohore, ndërkohë që Evropa po përballet me stuhi të fuqishme, të izoluara në zona të caktuara.
Vapa e fortë në viset tona do të vazhdojë edhe ditëve të ardhshme, ndërkohë që Të premten dhe të shtunën pritet kulminacioni i nxehtësisë. E Premtja do të jetë stabile dhe me diell, ndërsa po ashtu parashihet edhe dita e shtunë shumë e nxehtë, megjithatë të shtunën do të vërehet zhvillime të disa vranësirave konvektive që në disa zona të izoluara mund të shkaktojnë ndonjë rrebesh të fuqishëm kalimtar shiu. Njëkohësisht vazhdon vapa e madhe dhe ndjenja e zagushisë. Freskimi do të jetë vetëm në ato zona ku eventualisht mund të ketë vranësira me ndonjë rrebesh shiu.
E diela sjellë zhvillime të fuqishme sipas ecurive aktuale sinoptike, por jo në viset bregdetare.
Paraditja do të jetë shumë e nxehtë dhe me diell, kurse orëve të pasdite do të ketë zhvillime paksa më të fuqishme konvektive që do të kushtëzojnë rrebeshe lokale shiu me vetëtima, bubullimë dhe breshër. Zhvillimet do të jenë të karakterit lokal, ndërkohë që vazhdon ende i nxehti veror, por kësaj radhe pritet freskim i motit sidomos në zonat me rrebeshe shiu.
Vapa verore vazhdon në viset bregdetare edhe të dielën dhe fillim të javës së re me zhvillime të rralla bazuar në ecuritë aktuale, kurse në viset kontinentale zhvillimet do të jenë më të përhapura dhe më të fuqishme dhe si pasojë mund të përjetojmë ndonjë freski, megjithatë duhet pritur edhe pak dhe të shohim me saktësi se si do të zhvillohen ecuritë sinoptike./MeteoBallkan