Fillimi i janarit ka treguar fytyrën e vërtetë të dimrit. Pothuajse në të gjithë rajonin po mbretëron mot shumë i ftohtë dhe me reshje bore. Veçanërisht mot i ftohtë po mbretëron në Kroaci ku bura në zonën e Splitit pothuajse arriti shpejtësinë mesatare prej 100 km / h dhe gjatë kulmit të shpejtësisë edhe deri në 146.5 km / h
Mbrëmë në pjesën veriore të Kroacisë kishte edhe reshje të dendura bore. Mediat raportojnë se si pasojë e motit të keq janë anuluar edhe shumë fluturime.
Dëborë ra në Zagreb dhe rrethinën e saj, nga Siska në Krapinë.
Nga reshje intensive bore dhe temperatura të ulëta është përfshirë edhe Bosnjë e Hercegovina ku në pjesën më të madhe të vendit komunikacioni ka rënë në kolaps.
Gjendje më e mirë nuk paraqitet as në Serbi ku reshjet e borës që nuk kanë pushuar në 24 orët e fundit kanë shkaktuar probleme të mëdha, kryesisht në komunikacion. Në disa zona sasia e borës raportohet deri në gjysmë metre.
Edhe në Kosovë kishim reshje lokale bore të cilat vende – vende ishin intensive. Rrethina e Kaçanikut dhe Dragashit edhe kësaj radhe u prekën më së shumti nga reshjet, gjersa më pak reshje kishte në qendër dhe perëndim të vendit tonë. Banorët e një fshati në Komunën e Dragashit, kanë mbetur të bllokuar krejtësisht, pasi bora e madhe që ka rënë ditëve të fundit nuk është pastruar fare. Rrugët në fshatin Buqe janë bërë tërësisht të pakalueshme nga bora, kanë treguar disa banorë të atjeshëm. Si pasojë e reshjeve të borës gjatë ditës së djeshme kishin mbetur të bllokuara edhe rrugët për në Brezovicë.
Ndërkohë tek ne edhe sot do të ketë edhe erëra të ftohta veriore. Reshjet e borës nuk pritet të jenë intensive përpos në viset kodrinore-malore herë pas here. Temperaturat do të vazhdojnë të ulen.
Moti i keq ka përfshirë edhe Shqipërinë prej dy ditësh duke sjellë probleme në disa zona të vendit.
Disa fshatra të thellë në Bulqizë dhe në Dibër janë të izoluar nga dëbora.
Siç raportojnë mediat shqiptare në Dibër janë të bllokuara nga dëbora nëntë fshatra në njësinë Lurë, po ashtu edhe disa në Kalanë e Dodës, Grykë Nokë, Zall Dardhë, ndërsa në Bulqizë është e bllokuar Terrova. Për shkak të trashësisë së borës në këto zonja është i pamundur qarkullimi i automjeteve.
Ndërsa në qarkun e Korçës akset nacionale janë të kalueshme pa zinxhirë, në fshatrat turistikë si Dardhë dhe Voskopojë dëbora ka arritur nga 15-40 cm dhe lëvizja mund të bëhet vetëm me zinxhirë.
Sa i përket Maqededonisë reshjet më intensive të borës sot priten në jug të vendit. Sipas mediave atje borë po bie në Manastir, Kriva Pallankë, Dellçevë, Demir Kapi, Gostivar, Krushevë, Koçani, Mavrovë dhe në shtegun malor të Strazhës, Gjvato dhe Pletvar. Ende mbeten në fuqi ndalesat për lëvizjen e automjeteve të rënda në rrugën Mavrovë-Dibër dhe Gostivar-Kërçovë.
