Dy javët e fundit të Tetorit dhuruan mot stabil dhe me dominim të plotë anticiklonik, ndërkohë që stabiliteti atmosferik do të vazhdojë edhe gjatë javës së parë të Nëntorit.
Temperaturat do të vazhdojnë të jenë relativisht të larta, ndërsa rrymimet ajrore do të fillojnë të ndryshojnë. Deri më tani kemi pas rrymime ajrore kryesisht nga jugu dhe jugperëndimi, ndërsa gjatë kësaj jave gradualisht do të fillojnë rrymime ajrore nga veriu dhe verilindja, por këto rrymime ajrore nuk do të jenë aspak të fuqishme për të ndikuar shumë në uljen e temperaturave apo destabilizimin e atmosferës.
Gjithsesi temperaturat do të fillojnë të pësojnë ulje, por të lehta dhe graduale. Edhe vranësirat do të fillojnë të shtohen herë pas here, por pa ndonjë ndryshim të madh. Reshjet do të jenë të rralla dhe të izoluara. Mund të themi se kjo javë do të jetë krejtësisht e thatë me ndonjë përjashtim krejtësisht të vogël.
Temperaturat do të fillojnë të ulen në mënyrë progresive, pra çdo ditë ngapak, por (maksimalet) mbesin ende relativisht të larta deri në fundjavë. Në Fundjavë do të kemi një front ajror nga veriu i cili mund të lejojë depërtimin e një mase paksa më të ftohtë ajrore. Erërat veriore do të fuqizohen dhe temperaturat do të ulen. Edhe vranësirat do të shtohen, por pa reshje atmosferike. Mund të ketë ndonjë reshje sporadike dhe ndonjë fjollë kalimtare bore në viset e larta malore. Temperaturat e mëngjesit mund të ulen deri në -1 gradë Celsius krejt në fundjavë dhe krejt në fillim të javës tjetër.
Pra, edhe një javë me stabilitet atmosferik dhe me depërtime të ndonjë fronti krejtësisht të dobët të ftohtë ajror. Ulje të lehta të temperaturave gjatë javës, kurse në fundjavë ulje më e theksuar e tyre. Reshjet do të jenë krejtësisht të rralla, të pakta dhe të izoluara./MeteoBallkan
