Sot në Kosovë pritet ndryshim i motit. Paradite do të ketë erëra të ngrohta nga jugperëndimi. Gjatë ditës do të kemi depërtimin e një fronti të ftohtë ajror nga veriu i cili do të kushtëzojë dendësim të vranësirave, reshje kalimtare shiu dhe erërat do të ndryshojnë drejtim duke fryrë nga veriu e verilindja. Në viset kodrinore-malore do të ketë reshje kalimtare bore.
Temperaturat paradite do të jenë relativisht të larta, kurse pasdite do të pësojnë ulje.
Në Shqipëri, Maqedoninë Veriore, Luginë të Preshevës dhe Mal të Zi pritet të mbajë mot me diell, vranësira dhe reshje të pakta lokale shiu. Në viset malore reshje kalimtare bore. Reshje kalimtare priten në Kosovë, veri të Malit të Zi, disa vise të izoluara të Shqipërisë dhe pjesë të Maqedonisë së Veriut. Në pjesën më të madhe të Shqipërisë nuk priten reshje.
Mëngjesi i së mërkurës do të jetë paksa i ftohtë, me vranësira dhe reshje të izoluara bore në disa zona kryesisht kodrinore-malore. Gjatë ditës pritet stabilizim gradual i motit dhe priten më shumë intervale kohore me diell./MeteoBallkan
