Rajoni ynë është nën ndikimin e ciklonit të fuqishëm i cili me qendrën e tij gjendet në veriun e Italisë dhe Detit Adriatik tani. Qendra ciklonike ka presion shumë të ulët atmosferik kurse në jug të Detit Adriatik dhe në Detin Jon shtypja atmosferike është më e lartë dhe si pasojë vjen edhe deri te fuqizimi i erërave.
Për fat të mirë erërat e fuqishme nuk do të zgjasin shumë dhe do të dobësohen në mbrëmje. Erëra të fuqishme ka pothuajse në tërë rajonin tonë e sidomos në Kosovë, Mal të Zi, Shqipëri, Maqedoni, Bosnjë dhe Hercegovinë etj. Bosnja dhe Hercegovina është përfshirë edhe nga reshje të fuqishme shiu si dhe stuhi dhe rrebeshe shiu me vetëtima dhe bubullimë, kurse reshje të dendura shiu me stuhi do të ketë edhe në Mal të Zi dhe veriun e Shqipërisë. Gjatë mbrëmjes rrebeshe shiu do të përfshijnë edhe perëndimin dhe veriperëndimin e Kosovës, kurse lokalisht edhe pjesë tjera të Kosovës. Nuk përjashtohet mundësia që të ketë edhe vetëtima dhe bubullimë.
Pra, në mbrëmje pritet dobësim i erërave kurse nesër gjatë ditës do të fillojnë të fryjnë erëra të lehta deri mesatare nga veriu dhe verilindja.
