Autoriteti i Aeroporteve të Pakistanit njoftoi se një operacion kërkim-shpëtimi është duke u zhvilluar në Detin Arabik, pasi një avion mallrash me pesë anëtarë ekuipazhi u zhduk pranë brigjeve të Karaçit.
Avioni Boeing 737, i operuar nga K2 Airways, një kompani private e transportit ajror të mallrave me bazë në Karaçi, po fluturonte nga Sharjah në Emiratet e Bashkuara Arabe drejt Karaçit, kur në orën 21:18 me kohën lokale të së martës raportoi një “problem me sistemin e navigimit”.
Tre minuta më vonë, avioni ndryshoi papritur drejtimin dhe nisi një zbritje të shpejtë. Menjëherë pas kësaj humbi kontaktin me radarët dhe komunikimin me radio.
Sipas autoriteteve, avioni ndodhej rreth 287 kilometra në perëndim të Karaçit kur u zhduk.
Në një deklaratë, K2 Airways konfirmoi se në bord ndodheshin pesë persona.
“Vazhdojmë të lutemi me gjithë zemër për sigurinë e kolegëve tanë”, thuhet në deklaratë.
Kompania ajrore shtoi se po “bashkëpunon plotësisht me Autoritetin e Aviacionit Civil të Pakistanit dhe agjencitë e tjera qeveritare”.
Autoritetet identifikuan pilotët si kapiten Rizwan Idrees dhe zëvendëspilotin Faisal Jatoi, por nuk zbuluan identitetin e tre anëtarëve të tjerë të ekuipazhit.
Ata thanë se operacioni i kërkim-shpëtimit, ku janë përfshirë fregata detare, avionë patrullues detarë dhe mjete ajrore të forcave ajrore, është në zhvillim. Megjithatë, sipas tre zyrtarëve të njohur me operacionin që folën për Associated Press, ai po vështirësohet nga deti i trazuar për shkak të sezonit të musoneve.
Sipas shërbimit të monitorimit të fluturimeve Flightradar24, avioni fillimisht shfaqi humbje të lartësisë, më pas një ngjitje dhe më pas një rënie të dytë të papritur dhe dramatike. Të dhënat e fundit të transmetuara e tregonin avionin në një lartësi prej 1.100 këmbësh mbi nivelin e detit, duke zbritur me një shpejtësi prej 22.400 këmbësh në minutë, një ritëm jashtëzakonisht i madh dhe shumë i pazakontë.
Flightradar24 tha se të dhënat paraprake të fluturimit tregojnë për “një përplasje të mundshme në det, në jugperëndim të Karaçit”.
“Sa herë që sheh diçka kaq ekstreme, të tërheq menjëherë vëmendjen, por është ende herët për të thënë se çfarë do të thotë e gjithë kjo pa më shumë informacion”, tha për Reuters konsulenti i sigurisë ajrore Anthony Brickhouse.
Eksperti i aviacionit Imran Aslam tha për televizionin lokal ARY News të martën në mbrëmje se mbetet ende e paqartë se çfarë e shkaktoi zhdukjen e avionit nga radarët. Sipas tij, edhe në rast të një defekti në motor, një avion zakonisht vazhdon të rrëshqasë në ajër dhe nuk bie papritur.
Pakistan International Airlines, kompania kombëtare ajrore e vendit, shprehu keqardhje për “lajmin tragjik të rrëzimit të avionit të mallrave të K2 Airways në Detin Arabik”.
“Mendimet dhe lutjet tona janë me pesë anëtarët e ekuipazhit dhe familjet e tyre. Shpresojmë për një operacion të shpejtë dhe të suksesshëm kërkim-shpëtimi dhe kemi ofruar të gjithë mbështetjen e mundshme në këtë drejtim”, thuhet në deklaratën e kompanisë.
“Falënderojmë marinën, forcat ajrore dhe të gjitha mjetet detare në zonë që po marrin pjesë në operacion.”
Avioni i zhdukur ishte një Boeing 737-200, një model i hershëm i familjes Boeing 737 që hyri për herë të parë në shërbim në fund të viteve 1960. Ai është dy gjenerata më i vjetër se 737 MAX, versioni më i ri i këtij avioni, i cili mbeti për një kohë i pezulluar nga fluturimet në mbarë botën pas dy aksidenteve fatale që shkaktuan një krizë të madhe sigurie dhe ndryshime të gjera në projektim dhe rregullore.
