Edhe një javë tipike verore, e nxehtë, por jo ekstreme si dhe me paraqitje të rrebesheve verore të shiut me vetëtima dhe bubullimë, por këto do të jenë të izoluara dhe nuk do të marrin përmasa të mëdha.
Përderisa France dhe pjesë të Evropës do të përjetojnë edhe një valë të madhe nxehtësie ne do të jemi në përiferi të kësaj mase të nxehtë prandaj nxehtësia nuk do të jetë shumë ekstreme edhe pse normalisht priten ditë mjaft të nxehta dhe me zagushi.
E hëna filloi me diell dhe vranësira por mbeti stabile. Në aspektin termik në shumë rajone ishte freskët.
Të martën do të ketë rritje të temperaturave në nivel rajoni, prandaj në të gjitha viset do të jetë më nxehtë me zhvillime të vranësirave të pakta ditore, por pa reshje atmosferike.
Dita e mërkurë do të jetë edhe më e nxehtë, por njëkohësisht do të kemi pak më shumë vranësira e në rajone të caktuara edhe zhvillime konvektive të cilat do të kushtëzojnë rrebeshe të izoluara shiu me vetëtima dhe bubullimë. Ka mundësi që të ketë edhe ndonjë stuhi të izoluar me rrebeshe intensive, por kjo do të ndodhë vetëm në disa rajone, prandaj themi “zhvillime të izoluara”.
Edhe dita e enjte do të jetë e nxehtë, me diell, por edhe zhvillime të rrebesheve lokale të shiut me vetëtima dhe bubullimë. Temperaturat mund të pësojnë ulje kryesisht të lehta.
E Premtja dhe Shtuna do të karakterizohen me stabilitet atmosferik dhe me rritje të ndjeshme të temperaturave. Ditë shumë e nxehtë parashihet të jetë sidomos dita e Shtunë kur temperatura në Kosovë do të arrijë deri në 35 gradë Celsius, madje mund të ndodhë edhe ndonjë shkallë më lartë. Pasdite vonë dhe në mbrëmje priten stuhi të izoluara me vetëtima dhe bubullimë.
Të dielën parashihet të kemi depërtimin e një fronti të fuqishëm të ftohtë ajror me rrebeshe shiu, ulje të ndjeshme të temperaturave dhe freskim të theksuar të motit sidomos në viset kontinentale e më pak në viset bregdetare.
Pra, edhe një javë dinamike, me nxehtësi (jo shumë ekstreme) dhe nuk do të kemi mungesë edhe të stuhive lokale të shiut me vetëtima dhe bubullimë. Stuhitë nuk do të kapin gjithë territorin, por do të ndodhin në zona të caktuara apo vende-vende. Në bregdet kryesisht stabil gjatë tërë javës me ndonjë përjashtim.
Ditë më stabile do të jenë e Marta dhe e Premta, kurse ditë më jo-stabile do të jenë e mërkura, e enjtja, e shtuna vonë pasdite dhe në mbrëmje dhe e diela me ulje të temperaturave./MeteoBallkan
