Një vajzë 11-vjeçare, flokët e së cilës ngecën në tubin thithës të një pishine në qytetin italian Sestri Levante, ka ndërruar jetë.
Vajza, e cila u shtrua në njësinë e kujdesit intensiv të Spitalit të Fëmijëve Gaslini në Xhenova në gjendje kritike pas aksidentit, vdiq pa rifituar vetëdijen që nga momenti kur u nxor nga uji.
Tragjedia ndodhi të martën pasdite në Descalzo Promenade Resort. Vajza ishte në pishinë me nënën e saj. Ajo vendosi të hynte në pishinën e brendshme të objektit, ku uji është i cekët dhe më i freskët se deti. Askush nuk e di se si flokët e saj u ngecën në grykën thithëse, por forca e tërhoqi nën ujë dhe ajo nuk mundi të çlirohej dhe të dilte në sipërfaqe.
Ata që ishin dëshmitarë të tmerrit u përpoqën ta nxirrnin vajzën, por gjithçka ishte e komplikuar sepse flokët e saj ishin thithur plotësisht në grykë. Ambulanca që mbërriti në vendngjarje nuk mundi ta ndihmonte vajzën, kështu që ajo u dërgua në spital me helikopter, shkruan Sky News italiane. Fatkeqësisht, vajza nuk mbijetoi.
Familja e saj vendosi t’i dhuronte organet.
Pishina është mbyllur dhe hetuesit kanë marrë deklarata nga të gjithë ata që ishin atje në atë kohë. Roja Bregdetare dhe personeli ushtarak po mbledhin tani të gjithë dokumentacionin që lidhet me pishinën.
Dokumentet fillestare do t’i përcillen së shpejti zyrës së prokurorit, së bashku me raportet e sekuestrimeve dhe dëshmitë e mbledhura nga plazhistët që dëshmuan aksidentin. Nëna, e cila qëndroi në Spitalin Gaslini me vajzën e saj, mund të merret në pyetje në ditët në vijim.
