Pas reshjeve të bollshme atmosferike të cilat këto ditë ndikuan mirë në gjendjen e përgjithshme hidrologjike në Kosovë tani pritet të kemi fuqizimin gradual dhe të sigurtë të masave ajrore më të thata anticiklonike. Reshjet ishin të mirëserardhura me përjashtime në disa rajone ku shkaktuan dëme të konsiderueshme materiale.
Gjendja sinoptike po fillon të ndryshojë dhe tani masat ajrore jo-stabile mund ta kenë më të vështirë për të depërtuar në rajonin tonë për shkak të ardhjes, fuqizimit dhe konsolidimin të bllokadës anticiklonike dhe rrymave ajrore më të thata, megjithatë nuk do të mungojnë rrebeshet e izoluara, por ato të jenë të rralla, afatshkurtra dhe në rajone të izoluara.
E Hëna solli reshje atmosferike në shumë pjesë të viseve tona dhe deri në fund të ditës ende mund të ketë zhvillime të cilat do të jenë më të izoluara dhe të cilat do të humbin ndikimin e tyre gradualisht.
Masa ajrore më të ngrohta dhe më stabile nga Evropa dhe Afrika veriore do të fillojnë të depërtojnë sigurtë në drejtim të viseve tona duke filluar që nga e marta.
E Marta do të karakterizohet me mot më stabil, me diell, por edhe me vranësira ditore. Në disa rajone kryesisht kodrinore-malore nuk përjashtohet mundësia për ndonjë reshje afatshkurtër. Temperaturat do të fillojnë të rriten menjëherë.
Nga e mërkura do të kemi më shumë diell dhe më pak vranësira. Do të fryjnë erëra kryesisht nga verilindje në Kosovë e viset tjera kontinentale, kurse në Shqipëri drejtimi i erërave do të jetë nga veriperëndimi. Rrallë në disa zona në malet e Shqipërisë mund të ketë ndonjë rrebesh krejtësisht të izoluar me ndonjë bubullimë.
Temperaturat do të shënojnë rritje progresive.
E Enjtja dhe fundjava po ashtu do të karakterizohen me kushte kryesisht stabile anticiklonike dhe disa vranësira do të shfaqen pak më shumë në viset malore, por edhe në disa zona bregdetare në Shqipëri. Këto vranësira nuk do të kenë kurrfar ndikimi në stabilitetin e atmosferës.
Temperaturat do të shënojnë rritje progresive, pra nga dita në ditë gjithnjë e më nxehtë.
Minimalja për këtë javë parashihet të zbres deri në 13 gradë Celsius, kurse maksimalja parashihet të arrijë deri në 36 gradë Celsius në Kosovë, kurse në Shqipëri dhe Maqedoninë Veriore do të jetë për ndonjë gradë edhe më nxehtë në zonat më të nxehta mesdhetare, zona që tradicionalisht janë më të nxehtat gjatë verës temperaturat mund ti afrohen shumë afër shifrës 40 gradë Celsius.
Kjo do të jetë fillimi i një vale më të re të nxehtësisë e cila në fillim nuk do të jetë shumë intensive, por do të vjen duke u fuqizuar gradualisht nga dita në ditë. Kjo valë nxehtësie mund të zgjasë edhe me javë.
Ishte ky parashikimi javor për motin gjatë kësaj jave nga MeteoBallkan. Ndryshime në parashikim kësaj radhe vështirë që mund të ketë, por për çdo eventualitet na ndiqni në postimet tona të përditshme më të detajuara./MeteoBallkan
