Situata sinoptike po shkon në atë drejtim siç patëm paralajmëruar edhe disa ditë më parë. Pra, pas disa ditëve mjaft të mira pranverore nga e Premta pritet ndryshim i kushteve klimatike. Anticikloni i fuqishëm do të tërhiqet pak në drejtim të Perëndimit dhe Skandinavisë dhe në këtë mënyrë do të hapet rruga masës ajrore me origjinë polare nga Rusia që të niset në drejtim të rajonit tonë. Kjo masë ajrore Siberike vetëm se është nisur por do të kalojnë disa ditë deri sa të arrijë tek ne.
Të Premtën pra, në Kosovë, disa pjesë të Shqipërisë dhe Maqedoni priten reshje shiu të cilat me uljen e temperaturave do të shndërrohen në reshje bore. Gjithashtu do të kemi edhe erëra të fuqishme veriore të cilat do të fuqizojnë ndjeshmërinë subjektive të të ftohtit. Pra, thënë në përgjithësi na pret një fundjavë mjaft e ftohtë, me erëra të ftohta veriore, kurse të Premtën dhe të shtunën edhe me reshje të herëpashershme atmosferike. Njëherë për njëherë nuk parashikohen reshje të mëdha./Meteoballkan
