Një gazetar spanjoll u përball me një moment të frikshëm gjatë një raportimi drejtpërdrejt nga bregdeti i Ondarroas, në rajonin bask të Spanjës, kur një valë e madhe e goditi atë dhe kameramanen që po e filmonte.
Gazetari Sergio Ovejero po raportonte për përkeqësimin e kushteve atmosferike dhe dallgët e fuqishme të detit, kur papritur një valë kapërceu murin mbrojtës të shëtitores dhe i përfshiu të dy, shkruajnë mediat.
Fuqia e ujit tronditi kamerën, ndërsa pamjet u mbuluan nga uji dhe transmetimi televiziv u ndërpre për disa çaste.
Nga studioja, prezantuesi reagoi me shqetësim, duke shpresuar që kolegët e tij të ishin mirë.
Më vonë u konfirmua se gazetari dhe kameramanja kishin shpëtuar pa lëndime serioze.
Ngjarja ndodhi më 22 tetor, gjatë një raportimi për televizionin bask ETB2.
