Masa e fuqishme ajrore e ftohtë nga Siberia sonte në mbrëmje dhe gjatë natës do të depërtojë në rajonin tonë. Fillimisht do të kemi depërtimin e frontit të fuqishëm të ftohtë ajror i cili do të përcillet me erëra të fuqishme dhe reshje lokale bore. Me depërtimin e masës së fuqishme ajrore Siberike në Detin Jon do të krijohet një ciklon. Ky ciklon do të krijohet gjatë natës apo në orët e hershme të mëngjesit të nesërm.
Pasi që kemi anticiklonin shumë të fuqishëm në Evropë që shtrihet deri tek ne, kontakti apo bashkëveprimi mes këtij anticikloni dhe ciklonit në Detin Jon do të krijojë procese mjaft të bujshme atmosferike mbi rajonin tonë. Reshje bore priten në Kosovë por jo intensive, pastaj reshjet e borës do të zhvendosën në drejtim të Shqipërisë nesër në mëngjes dhe paradite si dhe gjatë ditës. Në Shqipëri reshje bore do të ketë në shumë rajone ku fenomeni është i rrallë. Kjo nuk do të thotë se do të ketë borë në çdo centimetër të territorit shqiptar por në shumë rajone. Ne fuqimisht besojmë se shumë rajone ku bora është një fenomen jashtëzakonisht i rallë do të paraqitet duke përfshirë edhe shumë rajone bregdetare. Kjo nuk do të thotë se do të ketë reshje intensive bore, por reshje simbolike : diku më shumë e diku më pak.
Sidoqoftë përpos erërave të fuqishme veriore priten edhe ulje të theksuara të temperaturave. Reshje më të dendura bore priten në Maqedoni, kurse stuhi dhe furtuna dimërore priten në Greqi dhe Turqi. Stambolli do të zbardhet tërësisht nga reshjet e dendura të borës./Meteoballkan
