Temperaturat po shënojnë ulje të ndjeshme sidomos orëve të mbrëmjes dhe tani kemi edhe kthjellimin e motit dhe mbizotërimin e masës së ftohtë ajrore pikërisht mbi territoret tona.
Si pasojë gjatë orëve të natës dhe mëngjesit të hershëm temperaturat në shumë vise të Kosovës do të kalojnë në “minus”, sidomos në viset kodrinore-malore, por edhe në shumë vise të ulëta. Temperaturat pritet të zbresin deri në -2 dhe -3 gradë Celsius e në ndonjë rast ekstrem ato mund të zbresin edhe më shumë sidomos në disa zona malore ku mund të zbresë deri në -5 gradë Celsius.
Ulja e temperaturave nën 0 gradë Celsius përpos Kosovës sonte do të vjen në shprehje edhe në veri dhe lindje të Shqipërisë, shumë pjesë të Maqedonisë së Veriut, disa vise në Luginën e Preshevës e më së ftohti do të jetë në veri të Malit të Zi, jugperëndim të Serbisë dhe malet e Bosnjës dhe Hercegovinës.
Pas lindjes së diellit temperaturat do të dalin shumë shpejt në “plus” ndërsa gjatë ditëve të ardhshme nuk pritet të ketë më acar. Mund të ndodhë edhe mëngjesi i së Enjtes të ketë ngrica sporadike.
Ky acar mund të shkaktojë dëme të vogla, por nuk pritet të shkaktojë dëme të mëdha sepse nuk pritet të zgjasë shumë dhe vegjetacioni ende nuk është në fazën finale, por gjithsesi mund të ketë dëmtime të vogla në kulturat më të hershme.
Sipas ecurive aktuale sinoptike këtë fillim-pranverë nuk presim ndonjë acar sikur viteve të kaluara dhe kjo është shumë e mirëseardhur dhe të shpresojmë që të mos kemi ndonjë goditje të befasishme dimërore./MeteoBallkan
