Cikloni i stacionuar në Itali po afrohet gjithnjë e më shumë viseve tona dhe sonte vonë në mbrëmje dhe gjatë natës pritet të fillojnë reshje lokale shiu, por jo në të gjitha viset.
Reshje lokale shiu gjatë natës priten të ketë në rajonin e Dukagjinit në Kosovë si në rajonin e Pejës, Deçanit, Gjakovës dhe zonat përreth ku mund të ketë edhe rrebesh shiu me ndonjë vetëtimë dhe bubullimë. Lokalisht mund të ketë edhe në ndonjë zonë tjetër.
Reshje më intensive me vetëtima dhe bubullimë pritet të fillojnë në veriperëndim dhe veri të Shqipërisë, pastaj edhe në pjesët qendrore bregdetare deri në jug. Reshjet dhe rrebeshet do të jenë të karakterit lokal, por kjo do të jetë hyrje në destabilizim të mëtutjeshëm të atmosferës. Të Enjten edhe në Kosovë priten zhvillime të rrebesheve lokale të shiut me vetëtima dhe bubullimë dhe rrebeshe të izoluara priten edhe në disa vise të Shqipërisë dhe Maqedonisë së Veriut.
Edhe dita e Premte do të karakterizohet me zhvillime të rrebesheve lokale të shiut me vetëtima dhe bubullimë, në shumë në pjesë të Kosovës dhe Maqedonisë së Veriut, ndërsa në Shqipëri reshjet do të jenë më të izoluara.
Fundjava sjellë më shumë vranësira e rrebeshe lokale shiu, por të Shtunën mund të ketë edhe intervale të gjata kohore me diell, madje edhe në bregdetin shqiptar. Të dielen më shumë vranësira e reshje e rrebeshe shiu në gati të gjitha viset./MeteoBallkan
