Një kometë që kalon një herë në 71 vjet pranë Tokës do të mund të shihet brenda dy javëve të ardhshme, ka njoftuar NASA.
Astronomët njoftuan se kometa me shkëlqim të dukshëm mund të shihet me dylbi ose me një teleskop të vogël. duke paralajmëruar se për ta parë atë duhet të pozicionesh në një vend me qiell të errët, pa pemë të lartë ose kodra për ta bllokuar pamjen.
Independent ka shkruar se fillimisht duhet orientuar kah Jupiteri pasi kjo kometë do të nisë prej andej rrugëtimin. Kometat janë objekte qiellore që përbëhen nga pluhuri, shkëmbi dhe akulli.
Ato kanë një bisht dhe në momentin që i afrohen diellit, nisin të shkrihen dhe të zhduken.
Ekspertët thonë se kometa 12P/Pons-Brooks aktualisht po i afrohet Tokës. Për shumicën prej nesh, do të jetë e vetmja herë në jetën tonë që do të mund ta shohim atë.
Sipas astrofizikanëve, kometa pritet të arrijë pikën e saj më të afërt me Diellin më 21 prill dhe më afër Tokës më 2 qershor.
Projekti Virtual Telescope , një shërbim online i ofruar nga Observatori Astronomik Bellatrix në Itali, ka publikuar imazhe të kometës të marra nga qyteti toskan Manchiano, i cili krenohet me disa nga qiejt më të errët në Gadishullin Apenin.
“Për momentin, një kometë shumë e bukur po kalon qiellin e natës. Është kometa 12P/Pons-Brooks”, tha Gianluca Masi, drejtor i projektit Virtual Telescope.
“Kjo kometë quhet periodike. Thjesht do të thotë se ajo rrotullohet rreth Diellit, vetëm periodikisht hyn në brendësi të Sistemit Diellor për të vizituar mbretin e saj, Diellin. Pas çdo periudhe, në këtë rast, çdo 71 vjet, ajo kthehet në perihelionin e saj ”, shtoi Massi.
