Ndryshim të fuqishëm të kushteve atmosferike presim orëve të ardhshme me depërtimin e frontit të fuqishëm të ftohtë ajrore i cili vjen nga veriperëndimi i Kontinentit.
Fronti ka përshkuar shumë pjesë të Ballkanit si Kroacia, Bosnja dhe Hercegovina e dhe tani gjendet jo shumë larg viseve tona diku në perëndim të Serbisë duke shkaktuar reshje shiu, shqote e bore dhe lokalisht edhe shkarkesa atmosferike.
Orëve të mbrëmjes fronti depërton në Mal të Zi, Kosovë dhe veri të Shqipërisë, me zhvillime të fuqishme të vranësirave përreth frontit, ulje rapide të temperaturave dhe reshje lokalisht mjaft të dendura atmosferike. Reshjet do të jenë të përziera nga shiu, breshëri, Shqota dhe bora, lokalisht me shkarkesa atmosferike.
Reshjet më të dendura parashihen në jug të Malit të Zi, veri të Shqipërisë, Republikën e Kosovës dhe Luginën e Preshevës, por edhe në veri të Maqedonisë së Veriut dhe pjesët qendrore të Shqipërisë. Me depërtimin e frontit në jug të Shqipërisë dhe Maqedonisë së Veriut pritet dobësimi i tij dhe reshjet do të jenë shumë më të pakta në disa nga këto rajone.
Përpos rrebesheve të shiut në Kosovë do të ketë gjasa edhe për reshje bore gjatë orëve të natës edhe në disa zona të ulëta, ndërsa në viset malore pritet atmosferë e vërtetë dimërore.
Reshje bore priten edhe në viset malore të Shqipërisë dhe Maqedonisë së Veriut.
Me largimin e frontit temperatura mjaft të freskëta mbesin prezente edhe ditën e hënë dhe lokalisht reshjet do të vazhdojnë ende vetëm në disa vise, ndërsa mëngjesi i së martës mund të jetë me ngrica të dobëta. Nga e marta rrymime të forta ajrore nga jugu largojnë përfundimisht ajrin e ftohtë nga viset tona dhe nuk ka rrezik më rrezik nga ngricat, por do të vazhdojë mot jo-stabil me reshje të herëpashershme shiu./MeteoBallkan
