Ajri i ngrohtë afrikan është nisur në drejtim të viseve tona dhe pas kalimit të këtij sistemi masiv të vranësirave do të filloi të depërtojë në atmosferën dhe sipërfaqen e viseve tona, por ne këtë do ta ndjejmë ditën e Premte.
Pas disa ditëve me shumë vranësira e reshje të shpeshta më në fund do të kemi orë të shumta me rreze të ngrohta dhe të nxehta diellore, megjithatë duhet potencuar se moti nuk do të jetë plotësisht i stabilizuar.
Temperaturat do të arrijnë afërsisht deri në 28 apo 29 gradë Celsius, ndërsa në disa zona të nxehta të viseve tona ato mund të jenë edhe më të larta.
Përkundër rritjes së temperaturave dhe ardhjes së masave mjaft të ngrohta ajrore me origjinë nga Afrika veriore nuk do të kemi ndonjë anticiklon stabil që do të stabilizonte motin për një kohë më të gjatë, por masa ajrore jo-stabile apo të paqëndrueshme që do të kushtëzojnë stuhi të izoluara shiu me vetëtima dhe bubullimë, por së pari të Premten dhe të Shtunën kemi mot kryesisht me diell, mjaft të nxehtë dhe me më pak zhvillime në atmosferë.
Zhvillimet në atmosferë më të theksuara do të jenë të dielën orëve të pasdites ku priten shtrëngata të forta lokale me shkarkesa atmosferike dhe breshër.
Është a pamundur të përcaktohet saktë vendndodhja e këtyre stuhive, por do të mundohemi të japin informata të dobishme për ndryshimet në atmosferë që priten nga rritja e ndjeshme të temperaturave dhe kontakti i tyre me ajrin më të ftohtë e të paqëndrueshëm.
Në fund të theksojmë se të gjitha këto zhvillime do të jenë plotësisht normale dhe në përputhje të plotë me periudhën kohore në të cilën jemi, prandaj nuk do të ndodhë asgjë e jashtëzakonshme./MeteoBallkan
