Edhe pse Bashkimi Evropian disa vite më parë njoftoi se do të heqë orën verore dhe dimërore , sistemi i unifikuar ende nuk është futur, kështu që akrepat së shpejti do të lëvizin sërish.
Ora dimërore ndërrohet në çdo fundjavë të fundit të tetorit në natën ndërmjet së shtunës dhe të dielës, ndërsa ora verore ndërrohet në javën e fundit të marsit kur ora shtyhet një orë përpara.
Edhe pse shumë besojnë se lëvizja e orës prish bioritmin, për disa, kalimi në orën dimërore nuk do të jetë i vështirë, sepse do të flenë një orë më shumë.
Natën e 26-27 tetorit 2024, akrepat zhvendosen një orë mbrapa.
Në mars të vitit 2019, një shumicë në Parlamentin Evropian votoi për t’i dhënë fund ndryshimit të orës sezonale pasi 84 përqind e pjesëmarrësve në sondazh shprehën mbështetje për idenë. Por vetëm 4.6 milionë njerëz morën pjesë në sondazh, që është afërsisht 1% e popullsisë evropiane, dy të tretat e të cilëve ishin gjermanë.
Hapi tjetër ishte që çdo shtet anëtar i BE-së të vendoste nëse do të mbante orën verore (CEST) apo do të kthehej në atë standarde (CET). Megjithatë, kishte shqetësime se një vendim i tillë mund të çonte në zona të ndryshme kohore në të gjithë Evropën, duke krijuar një “njollë” të mundshme të zonave kohore.
Kalimi në orën verore duhej të zbatohej për herë të fundit në mars të vitit 2021, por çështja nuk është rishqyrtuar në Bruksel që atëherë, pasi duket se nuk ka interes të konsiderueshëm midis shteteve anëtare për trajtimin e çështjes.
Ora e Evropës Qendrore (CET) është në fakt kohë standarde, jo dimërore, siç quhet shpesh në gjuhën e folur.
Ndryshimi i orës në Europë u vendos si ligj evropian në vitin 1981. Zhvendosja e akrepave në Europën Perëndimore është vendosur në fillim të viteve ‘70-ta me shpjegimin se me këtë “zgjatet” dita, rritet produktiviteti, përmirësohet aftësimi i njerëzve dhe dita e punës bëhet më efikase.
/MeteoBallkan/
