Agjencia për Mbrojtjen e Mjedisit të Kosovës, ka theksuar se të mërkurën cilësia e ajrit ka qenë më e rënduar se ditët e tjera. Sipas kësaj agjencie, gjendje më e rënduar ka qenë në Prishtinë, Gjilan, Mitrovicë dhe Pejë.
“Gjatë ditës së djeshme është vërejtur situatë më e rënduar e cilësisë së ajrit krahasuar me ditët tjera, në mënyrë të veçantë për Grimcat e Pluhurit PM10 dhe PM2.5. Gjendje e rënduar e cilësisë së ajrit për parametrat PM10 dhe PM2.5 është regjistruar sidomos në stacionet në Prishtinë, Gjilan, Mitrovicë dhe Pejë”, ka njoftuar AMMK.
AMMK ka sqaruar se kjo situatë ka ardhur si rezultat i kushteve meteorologjike në të cilat ndodhej vendi.
Sipas të dhënave meteorologjike të IHMK, Kosova gjatë këtyre ditëve ishte nën ndikimin e masave të ajrit me origjinë nga Afrika Veriore.
Pluhuri i ardhur nga Sahara në Evropë që ka përfshirë edhe Kosovën ka ndikuar në rritjen e vlerave të grimcave të pluhurit, sipas agjencisë.
“Bartja e pluhurit dhe grimcave të vogla të rërës nga Sahara, është një fenomen që përfshinë shpesh Evropën dhe që manifestohet kryesisht me praninë e grimcave të pluhurit në ajër”, ka theksuar AMMK.
