Atmosfera në Ballkan sonte është aq jo-stabile sikur të jemi në mes të verës dhe natyrisht këtë e kanë mundësuar temperaturat e larta dhe ndryshimet e temperaturave shumë të nxehta në jug e shumë të ftohta në veri.
Stuhi të fuqishme me breshër, vetëtima e bubullima masive në këto çaste ka në Mal të Zi, afër veriut e veriperëndimit të Shqipërisë, jug të Bosnjës e Hercegovinës dhe perëndim e jugperëndim të Serbisë, ndërsa disa vetëtima sporadike kanë ndodhur edhe në Kosovë.
Gjatë orëve të ardhshme sistemi pritet të lëvizë drejt juglindjes duke përfshirë edhe Kosovën ku priten rrebeshe lokale shiu me vetëtima dhe bubullimë. Vende-vende priten rrebeshe intensive dhe mundësi edhe për breshër.
Sistemi frontal së bashku me ciklonin mesdhetar do të fillojnë të dobësohen gjatë mëngjesit ose paraditës së të shtunës, ndërsa deri atëherë priten rrebeshe lokale shiu me bubullima.
Gjatë pasdites ose mbrëmjes së të shtunës do të ketë ulje të temperaturave të cilat do të ndjehen më shumë gjatë së dieles. Me uljen e temperaturave mund të ketë reshje kalimtare, sporadike shqote e bore, por në përgjithësi reshjet do të dobësohen e nga e diela nuk priten më reshje atmosferike./MeteoBallkan
