Sot në Kosovë do të mbajë mot me intervale kohore me diell paradite, kurse gjatë ditës pritet të ketë shtim të vranësirave, por do të mbetet thatë. Mëngjesi do të jetë mjaft i ftohtë dhe me ngrica si dhe me mundësi edhe për mjegull.
Në Shqipëri pritet që vranësirat të rikthehen, kurse në jug të vendit pritet të ketë edhe reshje shiu pasdite vonë.
Edhe në Maqedoninë Veriore pritet të mbajë mot i vranët, ndërsa pasdite vonë mund të ketë riga të dobëta shiu, kurse në viset kodrinore-malore fjolla dëbore.
Të shtunën dhe të dielën në tërë rajonin na pret mot kryesisht i vranët, me erëra verilindore dhe vende-vende pritet të ketë edhe reshje shiu të intensitetit kryesisht të dobët. Në viset kodrinore-malore mund të ketë fjolla dëbore. Reshje mesatare shiu priten në Maqedoninë Veriore dhe disa pjesë të Shqipërisë. Të dielën vende-vende mund të ketë edhe intervale kohore me diell.
Nga e hëna na pret mot me shumë rreze diellore dhe me ngritje të temperaturave ditore, por mëngjeset do të vazhdojnë të jenë të ftohta.
