Sot në Kosovë do të vazhdojë moti i nxehtë dhe me zagushi të fortë, por priten edhe vranësira lokale, ndërsa orëve të pasdites ato pritet të zhvillohen duke kushtëzuar rrebeshe të izoluara shiu me vetëtima dhe bubullimë. Mund të ndodhë edhe ndonjë stuhi e fuqishme, por e izoluar, ndërsa temperaturat maksimale parashihen deri në 35 gradë Ceslius.
Në Shqipëri, Maqedoninë Veriore, Luginë të Preshevës dhe Mal të ZI pritet të mbajë mot me diell dhe vranësira lokale. Pasdite në shumë zona zona në Shqipërinë kontientale parashihen zhvillime të rrebesheve lokale të shiut me vetëtima dhe bubullimë. Rrebeshe lokale priten edhe në perëndim të Maqedonisë së Veriut, veri të Malit të Zi dhe aty-këtu në Luginë të Preshevës. Të gjitha zhvillimet do të jenë të karakterit lokal dhe më shumë në viset kodrinore-malore, por në disa zona priten rrebeshe intensive, kurse në zona tjera nuk priten fare.
Të shtunën në Kosovë parashihen destabilizim më i fuqishëm i motit me rrebeshe lokalisht intensive shiu me vetëtima, bubullimë dhe gjasa për breshër lokal. Rrebeshe lokale parashihen edhe në zona tjera sidomos në Maqedoninë Veriore, veri të Malit të Zi dhe aty-këtu në Shqipërinë kontinentale. Prapë të gjitha zhvillimet do të jenë të karakterit lokal, por kësaj radhe me shtrirje më të gjerë në Kosovë.
Temperaturat do të pësojnë ulje çdo ditë ngapak, ndërsa të dielën na pret mot me intervale të gjata kohore me diell dhe vranësira lokale e në disa zona me rrebeshe afatshkurtra shiu. Të Hënën pasdite mund të kemi rrebeshe mjaft intensive shiu me vetëtima dhe bubullimë./MeteoBallkan
