Ditëve të fundit në MeteoBallkan kanë arritur disa pyetje për “drita të pazakonta” në qiell e “lëvizje të yjeve”, siç e kan përshkruar disa. Nuk ka asgjë për t’u shqetësuar, në fakt kjo është periudha e vitit kur e kemi të pranishëm fenomenin e shiut të meteorëve (ang: meteor shower), që krijon pamje të bukura në qiell dhe në botë shihet më shumë si atraksion qiellor se si ndonjë rrezik natyror.
Shiu i meteorëve Lyrid, që ka ndodhur në muajin prill për 2,700 vitet e fundit, kulminacionin e shfaqjes së tij e arrin në këtë javë. Këtë vit pritet që qiellin ta ndriçojnë nga 10 deri në 20 yje lëvizës (shooting star), që më shumë se gjithçka do të sjell ngazëllim për secilin që është i mbyllur në karantinë.
Sipas mediave të huaja, përkundër se këtë vit shiu i meteorëve do të jept paksa më i dobët, do të prodhojë ende pamje të mjaftueshme spektakolare, shkruan MeteoBallkan.
Zakonisht shiu i meteorëve mund të shihet nga datat 14 deri më 30 prill, por sipas earthsky.org, këtë vit kulminacioni do të arrihet nga fundajva, përkatësisht nga e diela e 19 prillit deri në mëngjesin e hershëm të së mërkurës së 22 prillit. Koha më e përshtatshme për ta parë spektaklin në qiell, është kur është errët. EarthSky rekomandon që shiu i meteorëve të ndiqet nga mesnata deri në agim, pavarësisht në cilën pjesë të Tokës gjendeni.
Shiu i meteorëve Lyrid ndodh afër Konstelacionit Lyra, ku gjendet ylli më i shndërritshëm në lindje, Vega. Nuk është e nevojshme të jeni astronom për ta gjetur vendndodhjen e spektaklit. Shumë njerëz tashmë e kanë vërejtur pa ndonjë këshillë. Vetëm drejtoni kokën nga qielli drejt lindjes dhe do të jetë e lehtë të shihet.
Yjet lëvizës, në fakt janë copëza të vogla pluhuri që ndriçojnë kur hyjnë në atmosferën e Tokës. Në këtë rast, shiu i meteorëve Lyrid shkaktohet nga mbetjet e kometës C/186 G1 Thatcher. Përderisa kjo kometë bën orbitën rreth diellit një herë në 415 vite, bishti i saj i gjatë nga copëzat e mbetura, ka shkaktuar shiun e meteorëve Lyrid për çdo muaj prill në 2,000 vitet e fundit. /MeteoBallkan/
Burimi: Shooting stars will light up the night sky this week — here’s how to watch
