Sot është kulminacioni i “aktiviteteve ciklonike” sidomos në Ballkan por mund të themi edhe në Evropë.
Sistemet masive ciklonike po mbretërojnë që nga Skandinavia ku është cikloni i madh amë dhe super-cikloni që nga Franca po vjen në Kosovë i quajtur “Caetano”.
Ky ciklon solli reshje të fuqishme bore që nga Franca, Zvicra, jugu i Gjermanisë, Austria, pjesë të Ballkanit verior dhe veriperëndimor. Tani cikloni është duke shkaktuar reshje të dendura bore në Bosnjë dhe Hercegovinë.
Qendra ciklonike tani është shumë afër Kosovës diku në jugperëndim të Serbisë. Para ardhjes së qendrës ciklonike kemi fuqizimin e erërave jugore dhe reshje lokale shiu të cilat pritet të fuqizohen gjatë orëve të ardhshme. Me kalimin e qendrës ciklonike në lindje të Kontinentit në Kosovë dhe rajon do të arrijë fronti i ftohtë edhe kësaj radhe shumë i fuqishëm nga veriu. Me depërtimin e frontit të ftohtë priten erërat më të fuqishme që mund të shkaktojnë edhe dëme në disa zona. Shiu do të shndërrohet në borë në shumë pjesë të Republikës së Kosovës. Nganjëherë, vende-vende priten reshje të dendura bore dhe shtresa bore gjithnjë pas reshjeve mjaft intensive të shiut që priten orëve të ardhshme.
Duke pas para sysh atmosferën shumë jo-stabile dhe ardhjen e frontit potent të ftohtë ajror, prapë mund të kemi shkarkesa të forta atmosferike apo vetëtima dhe bubullimë në kombinim me reshjet e borës.
Reshje dhe rrebeshe të dendura shiu sot kemi dhe priten në Shqipëri, Mal të Zi, pastaj më vonë edhe në Maqedoninë Veriore ku në fund të reshjeve do të paraqiten reshje kalimtare bore edhe në zona më të ulëta të Maqedonisë së Veriut dhe Shqipërisë lindore, juglindore dhe disa zona tjera.
Reshjet më të dendura të borës prapë priten në shumë zona të Rrafshit të Kosovës, Luginës të Preshevës dhe veriut të Malit të Zi. Normalisht edhe në shumë zona kodrinore-malore të tërë rajonit. Reshje kalimtare, lokale bore mund të ketë sonte edhe në Dukagjin.
Pra, para nesh edhe një front i ftohtë ajror mjaft i fuqishëm. Deri atëherë reshje shiu mjaft intensive, pastaj edhe reshje bore me mundësi për disa bubullima të zhurmshme. Erërat do të fuqizohen dhe arrijnë kulminacionin në mbrëmje kur depërton fronti i ftohtë ajror, prandaj rekomandohet kujdes shumë i madh në mbrëmje.
Pas frontit do të vazhdojnë reshjet e borës, ndërsa gjatë natës erërat do të vijnë duke u dobësuar dukshëm, ndërsa depërtojnë temperatura me origjinë polare, fundjava sjellë mot më të qetë por të ftohtë./MeteoBallkan
