Cikloni mjaft i fuqishëm në këto çaste gjendet përtej Italisë, mes brigjeve të Italisë perëndimore dhe Tunizisë në Afrikën veriore dhe ky ciklon ka shtrirje të madhe gjeografike në Afriken veriore dhe do të zgjerohet në drejtim të Italisë.
Në Itali priten stuhi të fuqishme shiu me vetëtima, bubullimë dhe breshër. Cikloni me frontet e tij nesër dhe sidomos pasnesër arrin në Shqipëri dhe Kosovë duke shtuar vranësirat dhe duke dërguar porcione reshjesh atmosferike në formë shiu dhe nganjëherë në formë të ndonjë rrebeshi me vetëtima dhe bubullimë.
Rrugëtimi i ciklonit që nga Afrika veriore drejt Italisë dhe Ballkanit do të shkaktojë ardhjen e “baltës sahariane” të përzier edhe me reshjet atmosferike. Reshje më intensive priten në Shqipëri, por nganjëherë edhe në Kosovë dhe Maqedoninë Veriore, megjithatë nuk duhet pritur reshje masive.
Cikloni me frontet e tij do të shkaktojë edhe fuqizimin e mëtutjeshëm të erërave juglindore të cilat do të jenë të fuqishme sidomos në Rrafshin e Kosovës e veçanërisht në viset kodrinore-malore.
Temperaturat do të vazhdojnë të jenë të larta, ngase rrymimet ajrore do të jenë nga Afrika veriore dhe Mesdheu në drejtim të Ballkanit.
Për fundjavë do të kemi alternime mes vranësirave e intervale kohore me diell, ndërsa reshjet do të rrallohen. Erërat do të ndryshojnë drejtim dhe do të fillojnë të fryjnë nga jugperëndimi edhe këto të ngrohta.
Dimri mund të kthehet në Mars – modelet: në verilindje dhe lindje shfaqin “bishën nga lindja”!
Pas një javë vërejmë një ndryshim substancial në gjendjen sinoptike me krijimin e një anticikloni mjaft të fuqishëm në Siberi dhe Skandinavi. Kjo gjendje sinoptike favorizon shfaqjen e “bishes nga lindja” që nënkupton një masë mjaft të fuqishme e ftohtë ajrore me origjinë nga Siberia. Ende nuk dihet se me çfarë fuqie dhe me çfarë përmasash mund të kemi një skenar dimëror gjatë disa ditëve të Marsit. Kjo periudhë mbetet ende engimatike dhe shumë larg si dhe mbetet për tu parë dhe analizuar. Goditja dimërore në Mars do të jetë e fuqishme sidomos në lindje të Evropes, Ukrainë dhe Detin e Zi e deri në Turqi, ndërsa ende nuk dihet fuqia e goditjes eventuale dimërore në qendër, perëndim të Evropes dhe Ballkan./MeteoBallkan
