Nga Oqeani Atlantik, përmes Gadishullit Iberik dhe Francës në drejtim të Mesdheut kanë depërtuar fusha të fuqishme ajrore me presion të ulët atmosferik të cilat shtirhen deri në Afriken Veriore. Si pasojë në këto rajone kemi ciklonin e fuqishëm i cili ka destabilizuar kushtet atmosferike në tërë këto rajonet që përmendëm më lartë duke shkaktuar reshje të fuqishme atmosferike, erëra të fuqishme si dhe depërtimin e pluhurit saharian deri në Britaninë e Madhe.
Pluhuri i Shkretëtirës së Saharasë do të depërtojë edhe mbi rajonin tonë sonte gjatë natës kur edhe priten reshje shiu të cilat do të përzihen me këto substanca aktive në atmosferë, duke shkaktuar edhe reshje të përziera me rërën Sahariane. Gjithashtu do të kemi edhe fuqizimin gradual të erërave jugore dhe juglindore.
Paralelisht ciklonit të fuqishëm në Mesdhe, në Skandinavi kemi anticiklonin mjaft të fuqishëm dhe këto dy masa gjigande ajrore do të përplasën pikërisht mbi rajonin tonë. Për këtë arsye gjatë natës dhe sidomos nesër priten erëra vende-vende të fuqishme jugore. Reshjet atmosferike do të jenë kalimtare posaqërisht në Shqipëri. Në Kosovë priten reshje më të mëdha dhe reshjet do të riaktivizohen përsëri gjatë pasditës së të martës por vetëm vende-vende. Erërat do të dobësohen në mbrëmjen e së mërkurës por ato nuk do të qetësohen tërësisht në të gjithë territorin. Gjatë të mërkurës dhe të enjtës pritet ngirtje e temperaturave, por mund të ketë edhe rrebeshe të izoluara shiu me vetëtima dhe bubullimë, posaqërisht në jug dhe lindje të Shqipërisë./Meteoballkan
