Në takimin e djeshëm të Qeverisë Kurti me kryetarët e komunave të Kosovës është diskutuar edhe për dëmet e shkaktuar nga vërshimet në disa prej komunave të vendit. Detaje më të hollësishme dha ministri i Bujqësisë, Faton Peci.
Peci deklaroi se shumë shpejt Qeveria e Kosovës do t’i kompensojë dëmet e vërshimeve të fundit në komunat e prekura.
“Sa i përket vërshimeve të fundit, në komunat si ajo e Mitrovicës, Skenderajt, Istogut e komuna të tjera nga shtatori I vitit të kaluar qeveria ka marrë vendimin për themelimin e një sekretariatit që funksionon brenda MPB-së ndërsa ne si ministri të linjës kemi nga një anëtar, kështu që tash e tutje të gjitha kompensimet e dëmeve do të realizohen përmes këtij sekretariati“, tha ministri.
Sipas tij tanimë për dëmet e shkaktuara nga vërshimet në komunat Mitrovicë, Skenderaj dhe Klinë është hartuar edhe një raport final.
“Dhe ne kemi një informacion se ekziston një raport final dhe ai është dërgu në Ministri të Financave dhe pritet që njërën nga mbledhjet e qeverisë që të kompensohen“, potencoi Peci.
