Masa ajrore mjaft jo-stabile me qendër në Detin e Zi dy ose tri ditët e ardhshme do të shkaktojë destabilizim të fuqishëm të atmosferës në shumë pjesë të Kosovë, Shqipërisë, Maqedonisë së Veriut, Luginës së Preshevës dhe Malit të Zi.
Sot (e mërkurë) pati jo-stabilitete atmosferike, por ato ishin të pakta dhe të izoluara, ndërsa dy ose tri ditët e ardhshme do të jenë më të përhapura, edhe pse ende nuk do të jenë të kënaqshme.
Temperaturat do të shënojnë ulje, veçanërisht në zonat dhe kohën e rrebesheve të shiut, ndërsa prapë do të ketë zona ku nuk priten reshje, ngase reshjet do të jenë tipike verore që nuk kapin tërë territorin.
Sidoqoftë, dita e Enjte dhe e Premte, përpos intervaleve kohore me diell do të krijojnë kushte për zhvillime të vranësirave të dendura të shiut të cilat do të kushtëzojnë reshje shiu e rrebeshe lokale shiu me vetëtima dhe bubullimë. Vende-vende priten shtrëngata të fuqishme çasti dhe mund të ketë edhe breshër.
Zhvillimet më të fuqishme pritet të ndodhin si zakonisht orëve të pasdites kur priten lokalisht që të ketë shkarkesa të forta atmosferike apo vetëtima dhe bubullima intensive. Mos prisni rrebesh në të gjitha cepet e territoreve tona.
Temperaturat do të jenë verore, me zbritje në kohën e rrebesheve të shiut, ndërsa me stabilizim e motit të dielën, temperaturat do të rriten menjëherë mbi 30 gradë Celsius.
Pra, pas shirave lokal nga e diela pritet përmirësim i plotë i motit dhe temperaturat do të vazhdojnë të jenë të larta në javën e parë të Shtatorit që garantojnë një javë verore dhe shumë të përshtatshme për pushime.
Nëse nuk ndodhë ndonjë ndryshim i papritur moti do të jetë mjaft i përshtatshëm për pushime të paktën deri me 5 Shtator, pastaj ka gjasa edhe më tutje, por kjo mbetet të shihet./MeteoBallkan
