Ditën e mërkurë në Kosovë do të kemi nivele të larta të instabiliteteve atmosferike dhe si pasojë parashihen vranësira të shpeshta dhe rrebeshe lokalisht intensive shiu me vetëtima, bubullimë dhe mundësi edhe për breshër në disa lokacione të izoluara.
Si pasojë e ardhjes së frontit të ftohtë dhe kontaktit me temperaturat shumë të larta që janë të pranishme do të ketë zhvillime të bujshme atmosferike në Kosovë. Zhvillimet masive do të jenë konvektive ku ka gjasa të mëdha për shira të rrëmbyeshëm lokal, erëra të fuqishme kalimtare, breshër dhe vetëtima e bubullima masive dhe shumë të zhurmshme. Reshjet mund të jenë problematike për disa zona, ngase mund të shkaktojnë vërshime të shpejta.
Rrebeshe lokale dhe ulje të temperaturave të Mërkurën parashihen edhe në Shqipëri, Maqedoninë Veriore, Luginë të Preshevës dhe Mal të Zi. Vende-vende do të ketë rrebeshe intensive parashihet të zhvillohen disa shtrëngata mjaft të fuqishme kalimtare.
Të paktën kështu parashohin modelet globale kompjuterike-numerike për parashikim të motit.
Të gjitha këto zhvillime do të jenë plotësisht normale, ngase stuhitë verore kanë ndodhur gjithnjë dhe do të ndodhin gjithnjë, prandaj larg teorive konspirative dhe dramatizimeve të panevojshme. Në kohën e stuhive eventuale rekomandohet kujdes i madh deri të kalon sepse çdo stuhi është kaluese dhe nuk zgjatë aq shumë.
Normalisht për ditën e mërkurë priten reshje dhe stuhi më të forta se zakonisht, por edhe kjo është brenda konditave normale.
Pas një periudhe mjaft të gjatë me temperatura dukshëm mbi 30 gradë Celsius dhe zagushi shumë të fortë verore këto reshje dhe ky front do ta largojnë përfundimisht ajrin e nxehtë afrikan nga viset tona, por kjo do të ndodhë përkohësisht, sepse temperaturat e larta rikthehen përsëri gjatë vikendit dhe kjo është pozitive sepse jemi në mes të verës dhe temperaturat e larta janë karakteristikë kryesore e kësaj stine.
Atmosfera do të fillojë të stabilizohet menjëherë të enjten kur do të kemi temperatura dukshëm më të këndshme, ndërsa reshje të pakta./MeteoBallkan
