Nata e sontme do të jetë shumë e ftohtë dhe me acar të fortë polar, por krejtësisht normale ngase jemi në mes të Janarit.
Në tërë territoret tona do të jemi në “minuse”, madje edhe në viset bregdetare temperaturat minimale do të zbresin rreth ose madje nën 0 gradë Ceslius, madje në disa zona bregdetare dhe aty afër temperatura minimale mund të ulet deri në -5 gradë Celsius.
Në zonat urbane si në Kosovë dhe rajon temperatura minimale pritet të lëvizë nga -4 deri në -10 gradë Celsius, ndërsa në zonat malore ajo mund të ulet deri në -15 gradë Celsius.
Fronti i ftohtë po kalon dhe temperaturat janë ulur. Edhe më ftohtë ndjehet (Windchill) temperatura për shkak të erërave mjaft të ftohta nga veriu dhe verilindja. Rrallë në disa vise kryesisht kodrinore-malore mund të ketë ndonjë reshje kalimtare bore.
Pas mëngjesit të acart edhe dita e shtunë do të jetë e ftohtë, por temperaturat pritet të dalin në “plus” në mesditë, për tu rikthyer menjëherë në “minus” pasdite vonë dhe në mbrëmje. Edhe nata tjetër do të jetë me acar, por më i butë se nata e sontme.
Të dielën ndryshon sinoptika, ngase do të fillojnë të fryjnë erëra mesatare deri të fuqishme nga jugperëndimi e këto erëra vijnë nga Mesdheu dhe përmbajnë ajrin e ngrohtë mesdhetar. Për këtë arsye do të kemi rritje të temperaturave të dielën dhe të hënën.
E Hëna sjellë reshje lokale shiu kryesisht në Shqipëri dhe Mal të Zi e në viset malore reshje lokale bore. Të martën një front i ri i ftohtë ajror sjellë reshje shiu e me ardhjen e frontit edhe reshje kalimtare bore në shumë pjesë të Republikës së Kosovës.
Nga e mërkura rritje të ndjeshme të temperaturave, por dimri do të rikthehet prapë./MeteoBallkan
