Edhe sot jemi nën ndikimin e masave mjaft të ngrohta ajrore me origjinë nga Mesdheu dhe Afrika Veriore. Temperaturat maksimale do të arrijnë dhe tejkalojnë 20 gradë Celsius. Njëkohësisht do të kemi fuqizim të erërave jugore dhe jugperëndimore dhe kjo ndërlidhet me frontin e fuqishëm të ftohtë ajror i cili nga Poli Verior do të depërtojë edhe tek ne.
Pikërisht ky front me origjinë polare përmes Skandinavisë dhe Evropes qendrore do të arrijë nesër pasdite tek ne dhe do të shkaktojë destabilizim të fuqishëm të motit.
Priten vranësira të dendura, erëra veriore, ulje të temperaturave, reshje të dendura shiu të cilat me uljen e temperaturave do të kalojnë në reshje të dendura bore në viset kodrinore-malore. Reshje estetike bore ose të përziera me shi do të ketë edhe në shumë qytete dhe qyteza të Republikës së Kosovës gjatë orëve të vona të mbrëmjes ose natën.
Fronti do të sjellë përkeqësim të shpejtë të motit dhe reshje intensive shiu dhe bore, por reshjet nuk do të zgjasin shumë. Duke filluar nga orët e hershme të mëngjesit të së mërkurës reshjet do të pushojnë, por do të jetë mjaft ftohtë dhe me erëra të ftohta veriore.
Nga e enjta do të kemi stabilizim të plotë të motit dhe ngritje të temperaturave. Ekziston potencial për ngrica të dobëta natën mes së mërkurës dhe së enjtes, sepse pritet që moti të kthjellohet dhe ajri polar do të jetë ende prezent pikërisht në ato momente, por të shpresojmë që kjo të kalojë sa më shpejtë dhe me sa më pak dëme./Meteoballkan
