Rajoni ynë vazhdon të mbetet nën ndikimin e masave ajrore mjaft të ngrohta me origjinë nga Afrika veriore, ndërsa siç po e shohim në fotografinë kryesore acari mjaft ekstrem po grumbullohet thellë në verilindje të Evropës dhe normalisht në Rusi. Pjesë nga ky acar ka filluar të përfshijë vendet evropiane, ndërsa në fund të javës do të përfshijë edhe Gadishullin Ballkanik.
Masat e ngrohta ajrore në rajonin tonë do të mbesin prezente edhe tri, më së shumti katër ditë, pastaj pritet depërtimi i masës mjaft të ftohtë ajrore nga verilindja e Kontinentit. Gjatë ditëve të ardhshme priten reshje të herëpashershme shiu dhe erëra jugore, ndërsa me fillimin e erërave veriore temperaturat do të shënojnë ulje të theksuara.
Sa i përket reshjeve të dëborës nga nesër do të shohim nëse do të kemi krijimin e ndonjë cikloni në Mesdhe i cili në kombinim me ajrin e ftohtë siberik do të na sillte edhe reshje bore, përndryshe nëse nuk do kemi ciklone reshjet e borës do të të jenë kalimtare, por do të krijojnë shtresa, ndërsa acari do të jetë i thatë por i fortë. Mbetet të shihet evoluimi i gjendjes sinoptike./Meteoballkan
