Zhvillimi i disa stuhive të izoluara në territorin e Kosovës ka kushtëzuar ulje të lehta të temperaturave, por kjo po ndodhë vetëm në disa zona, prandaj ajri shumë i nxehtë afrikan është ende prezent dhe do të mbetet deri në fillim të javës së re.
Erëra paksa të freskëta nga veriu kanë lehtësuar sadopak ndjenjën e zagushisë, megjithatë po e përsërisim se vapa nuk ka përfunduar dhe nuk do të përfundojë aq lehtë. Edhe dita e shtunë do të jetë shumë e nxehtë dhe me zagushi, por me freskime lokale të çastit nga ndonjë rrebesh ose stuhi të izoluar shiu. E diela më në fund do të sjellë më shumë vranësira dhe më shumë rrebeshe shiu dhe kjo do të ndikojë që temperaturat të ulen në shumë zona, por mos prisni ulje të mëdha të tyre.
Dy ditët e para të javës së do të ndalin përfundimisht këtë valë të mundimshme të nxehtësisë afrikane si dhe do të sjellin rrebeshe lokalisht intensive shiu me vetëtima dhe bubullimë. Ka gjasa edhe për zhvillime të disa shtrëngatave mjaft të fuqishme të shiut dhe breshërit. Rreshjet do të përfshijnë shumë territor që nga deti i Shqipërisë e deri në gati të gjitha viset kontinentale. Reshjet do të jenë të herëpashershme në formë të rrebesheve të fuqishme lokale dhe shtrëngatave po ashtu të cilat në disa rajone mund të jenë mjaft të fuqishme.
Lajmi i mirë është se të paktën përkohësisht do të ndalet nxehtësia e mundshme dhe po ashtu priten reshje intensive sidomos në zonat ku zhvillohen shtrëngatat e shiut. Por, në gjithë këtë lehtësim dhe freskim mund të kemi probleme me ndonjë shtrëngatë të fortë, reshje të rrëmbyeshme dhe vetëtima e bubullima masive. Varësisht nga rajoni në rajon dhe kohëzgjatja e stuhive eventuale.
Pas dy ose tri ditëve me stuhi të herëpashershme atmosfera do të stabilizohet dhe temperaturat do të rriten prapë mbi 30 gradë Celsius./MeteoBallkan
