Edhe pse moti do të ndryshojë paksa gjatë fundjavës ose më saktësisht të shtunën pasdite dhe gjatë natës ku reshjet do të jenë vetëm në disa zona, ndryshimi i madh i motit vjen ditën e hënë me reshje lokalisht intensive shiu.
Një ciklon shumë i fuqishëm që nga veriu i Evropës do të rrugëtojë drejt Evropës lindore do të shtrihet me frontet e tij deri në territoret tona duke kushtëzuar destabilizim të fuqishëm të motit. Fillimisht do të ketë fuqizim të rrymimeve ajrore nga jugperëndimi që janë masa të ngrohta ajrore para-frontale.
Gjatë ditës së hënë do të kemi zhvillime të fuqishme të vranësirave që do të kushtëzojnë reshje shiu, ndërsa priten edhe zhvillime të dendura konvektive sidomos pasditen e së hënës ku mund të kemi rrebeshe të fuqishme shiu me vetëtima dhe bubullimë.
Pas rrebesheve të fuqishme do të fillojnë erëra të ftohta nga veriu dhe në viset malore menjëherë do të shndërrohen në reshje bore. Gjatë natës në të martën mund të ketë reshje kalimtare bore edhe në disa zona më të ulëta në Kosovë, por shumica absolute e reshjeve do të jenë në formë shiu dhe rrebeshi. Me fillimin e erërave veriore do të fillojë depërtimi i masës mjaft të ftohtë ajrore me origjinë polare.
Për këtë arsye e marta pritet të jetë një ditë mjaft e ftohtë dhe me rrymime të forta ajrore nga veriu, por reshjet do të jenë sporadike në Kosovë, ndërsa në juglindje të Shqipërisë priten më shumë reshje bore.
Ajri i ftohtë polar do të jetë jetëshkurtër, ngase nga e mërkura do të ketë ndryshim të drejtimit të rrymimeve ajrore dhe do rë rifillojnë erëra nga jugperëndimi që do të kushtëzojnë rritje të temperaturave. Megjithatë mëngjesi i së mërkurës mund të jetë me acar në shumë vise kontinentale.
Fronti do të jetë intensiv dhe i pasur me lagështi dhe ajër të ftohtë, por kalimtar. E marta sjellë ulje të theksuara të temperaturave ( shumë pak reshje të martën në Kosovë), ndërsa nga e mërkura temperaturat do të fillojnë të kthehen gradualisht në normalitet./METEOBALLKAN
