Pas temperaturave pothuajse “pranverore” që mbretëruan dje në Kosovë për shkak të rrymimeve të fuqishme nga jugu, sot gjërat kanë ndryshuar, ngase era ka ndërru drejtim dhe ka filluar të fryjë nga veriu e verilindja. Si pasojë temperaturat kanë shënuar ulje të ndjeshme dhe në viset malore pati reshje bore. Reshjet e bores u paraqiten shkurtimisht edhe në disa vise pak më të ulëta mbidetare, por shumë pak.
Evropa po përjeton një “epokë” të mirëfilltë dimri dhe bore dhe kjo do të vijë te ne, megjithatë nuk do të zgjasë shumë.
Ashtu siç kemi paralajmëruar një kohë të gjatë nesër në Kosovë do të ketë reshje bore dhe ajri i ftohtë polar do të depërtojë edhe më thellë. Duhet ditur se nuk do të ketë reshje të mëdha bore, madje në disa ulëtisira të Dukagjinit nuk priten fare fjolla bore.
Ajri Arktik i shoqëruar me erëra të ftohta veriore do të arrijë nesër me intensitet pak më të lartë sidomos në mbrëmje duke ulur temperarat nën 0 gradë Celsius në shumë rajone të Kosovës ku priten fjolla lokale bore. Në Maqedoni fare pak borë kësaj radhe, madje krejt simbolike përpos viseve kodrinore-malore ku mund të ketë fjolla të herëpashershme.
Temperaturat minimale në Kosovë pritet të ulen afërsisht deri në -5 ose -6 gradë Celsius, ndërsa më gjerësisht në rajon deri në -12 gradë Celsius në zonat e ftohta malore (malet e Malit të Zi, Bosnjës e Serbisë jugperëndimore).
Megjithatë, duke filluar nga mesi i javes së re erërat do të ndryshojnë drejtim përsëri dhe do të fillojnë të fryjnë nga jugu duke rritur temperaturat dhe duke sjellur reshje të reja lokale shiu.
Të premtën pritet të jetë më të ngrohti ku temperaturat në Kosovë do të arrijnë mbi 15 gradë Celsius, por gjatë fundjavës tjetër pritet një tjetër goditje polare.
