Erërat veriore dhe verilindore që po fryjnë që nga mëngjesi kanë shkaktuar ulje të ndjeshme të temperaturave dhe temperaturat do të vazhdojnë të ulën edhe më tutje gjatë orëve në vijim. Kjo vjen si pasojë e depërtimit të masës së ftohtë ajrore që na vjen nga verilindja e Kontinentit.
Gjatë natës do të fillojnë edhe reshjet e borës në Kosovë të cilat do të krijojnë edhe shtresa bore, por jo të mëdha. Erërat verilindore dhe lindore do të vazhdojnë të na përkujtojnë ashpërsinë e dimrit në këtë fillim të pranverës. Gjatë ditës së nesërme do të ketë herë pas here reshje bore, por do të ketë edhe intervale të gjata kohore pa reshje fare. Reshjet e borës pritet të rikthehen përsëri gjatë natës dhe ditën e martë.
Dy tri ditët e para të javës do të jenë mjaft të ftohta dhe me reshje të herëpashershme bore në Kosovë, Maqedoni dhe pjesët kontinentale të Shqipërisë. Në viset bregdetare apo mesdhetare do të ketë reshje të shpeshta shiu. Nga mesi i javës e tutje temperaturat do të shënojnë ngritje graduale, por do të vazhdojnë të dominojnë vranësirat e dendura të cilat herë pas here do të na sjellin reshje të shiut, shqotës dhe borës./Meteoballkan
