Fronti i ftohtë me erëra veriore do hyjë në veri të Kosovës orëve të ardhshme, ndërsa në jug dhe perëndim të vendit do të vazhdojnë erërat jugore. Fronti do të kushtëzojë shtim të konsiderueshëm të vranësirave, ulje të temperaturave, erëra veriore dhe reshje shiu në ultësira e bore në viset kodrinore-malore.
Përderisa në veri do të zbresë dukshëm temperatura, në jug dhe perëndim të vendit do të vazhdojë të jetë shumë ngrohtë për këtë periudhë kohore, por fronti deri në mbrëmje do të arrijë deri në jug duke ulur edhe atje temperaturat.
Përpos reshjeve të shiut orëve të mbrëmjes do të ketë gjasa edhe për reshje bore në disa zona më të ulëta mbidetare të Republikës së Kosovës, kryesisht në disa zona të Rrafshit të Kosovës, por siç ka ndodh gjatë tërë këtij dimri as ky front nuk do të jetë shumë i pasur me lagështi në kohën e uljes së temperaturave, prandaj reshjet e borës do të jenë afatshkurtra.
Erërat veriore do të jenë të fuqishme kalimthi sidomos gjatë kalimit të frontit dhe pas tij, por shumë shpejt do të vijnë duke u dobësuar gradualisht.
Nga nesër stabilizim i motit, por dy mëngjeset e ardhshme lokalisht do të jenë me ngrica./METEOBALLKAN
