Sonte gjatë natës ose më mirë të themi orëve të hershme të mëngjesit pritet të depërtojë fronti i ftohtë ajror në Kosovë me reshje shiu e bore. Nëpër zonat më të ulëta priten reshje shiu e shqote, ndërsa në zonat kodrinore-malore priten reshje shqote e bore. Fronti do të kushtëzojë ulje të temperaturave dhe miks të reshjeve.
Me kalimin e frontit të ftohtë diku në jug të Adriatikut ose në Detin Jon pritet të krijohet një ciklon i cili do të mbajë mot me vranësira për disa ditë, prandaj ky front do të kalojë por mbetet ndikimi i ciklonit.
Reshjet e shiut e të borës do të fillojnë herë orëve të hershme të mëngjesit të së premtes, ndërkohë që ultësirat presin reshje të përziera, herë shi e herë borë, ndërsa skenar dimëror me borë pritet në viset kodrinore-malore.
Në Shqipëri dhe Maqedoninë Veriore, po ashtu pritet ndikimi i frontit, pastaj ciklonit në Detin Jon.
Reshje bore priten në të gjitha viset kodrinore-malore të Kosovës dhe Maqedonisë së Veriut dhe shumë viset malore të Shqipërisë.
Ultësirat e Rrafshit të Dukagjinit të Kosovës do të kenë kryesisht reshje shiu, por mund të ndodhë nganjëherë të ketë reshje të përziera ose reshje bore, ndërsa ultësira e Rrafshit të Kosovës do të kenë reshje të cilat do të shndërrohen nga shiu në borë, por pastaj edhe nga bora në shi, prandaj priten ndryshime të shpeshta në llojin e reshjeve atmosferike varësisht nga temperaturat. Masa e ftohtë Arktike nuk do të jetë shumë e konsoliduar sa për të sjellur reshje bore të qëndrueshme në të gjitha ultësirat. Megjithatë, shtresa bore priten edhe në disa zona më të ulëta në Republikën e Kosovës, por jo në zonat më të ulëta të vendit.
Reshje e shiut-borës (Kosovë) do ndërpriten gjatë ditës së Premte për rifilluar përsëri mëngjesin e hershëm të së shtunës ku priten kryesisht reshje bore. Shi vetëm në zonat më të ulëta. Pastaj të dielën bora prapë shndërrohet në shqotë e shi ndërsa më vonë prapë në shqotë dhe bore. Pra, pritet një miks prej reshjeve.
Pra, pas një dite shumë stabile atmosferike tani radhën e kanë vranësirat e dendura dhe reshjet e shpeshta të cilat herë pritet të jenë në formë dëbore e herë në formë shiu. Në viset malore pritet skenar i vërtetë dimëror dhe shtresa solide bore, prandaj duhet kujdes i madh dhe pa përgaditje adekuate dimërore mos u nisni në rrugëtim në viset malore./MeteoBallkan
